Ermənistan təxribat törədərsə, məsuliyyəti kimlər daşıyacaq? | Politoloqdan açıqlama

Aprelin 5-də Brüsseldə Avropa İttifaqı–Ermənistan-Amerika Birləşmiş Ştatları arasında təhlükəsizlik üzrə müştərək konfrans keçiriləcək.

Regionda xarici maraqların təmsilçisi olmaq siyasətinin davamı kimi rəsmi İrəvanın Cənubi Qafqazda etimad quruculuğuna və inteqrasiyaya zidd olan bu görüşdə iştirakına Azərbaycan Xarici İşlər Nazirliyindən də cavab gecikməyib. Əgər Ermənistan regionda sabitliyi pozan hər hansı təxribata yol verəcəksə, bunda Avropa İttifaqı və ABŞ məsuliyyət daşıyacaq.

Politoloq Zaur İbrahimli bildirib ki, qeyri-konstruktiv siyasətin nəticəsində hələ də Azərbaycanla Ermənistan arasında sülh sazişi imzalanmayıb:

“Məhz bu cür siyasət Ermənistana öz öhdəliklərindən yayınmaq imkanı verir. Həm ABŞ-nin, həm də Avropa İttifaqının təhlükəsizlik təminatı adı altında faktiki olaraq Ermənistanın hərbi potensialını gücləndirmək siyasəti yürütməsi revanşist siyasət tərəfdarlarını daha da gücləndirir, revanşist ideologiyanı möhkəmləndirir.

Çox təəssüf ki, Aİ-dən sonra ABŞ də bu prosesə qoşulub. ABŞ-nin də öz hərbçilərini Aİ-nin Ermənistandakı monitorinq missiyasında təmsil olunması ilə bağlı qərarı narahatlıq yaradır”.