2025-ci ildə Azərbaycanda hansı önəmli tədbirlər keçiriləcək?

Azərbaycanda 2025-ci ildə MDB çərçivəsində mühüm mədəniyyət və idman tədbirlərinin keçirilməsi planlaşdırılır.

Bunu Azərbaycanın Baş naziri Əli Əsədov MDB Hökumət Başçıları Şurasının iclasında bildirib.

Onun sözlərinə görə, Azərbaycan bu tədbirlərin keçirilməsinə fəal hazırlaşır.

"Biz "Birliyin Mədəniyyət Paytaxtları" dövlətlərarası proqramı çərçivəsində əməkdaşlığa böyük əhəmiyyət veririk. Məlum olduğu kimi, Dövlət Başçıları Şurasının bu ilin 8 oktyabr tarixli qərarına əsasən, Azərbaycan Respublikasının Laçın şəhəri 2025-ci ildə Birliyin Mədəniyyət Paytaxtı elan edilib", – Baş nazir bildirib.

O qeyd edib ki, gələn il Azərbaycanda III MDB Oyunları keçiriləcək:

"Məlum olduğu kimi, Gəncə şəhəri MDB-nin İdman Paytaxtı olacaq. Əminik ki, idman paytaxtı statusunun verilməsi şəhərin idman potensialını üzə çıxaracaq və idman turizminin inkişafı üçün əlverişli şərait yaradacaq".