3 ildir boş qalan yerlərə niyə millət vəkili seçilmir?

Millət vəkili Madər Musayevin vəfatı ilə parlamentdə boş qalan deputat yerlərinin sayı 8-ə çatıb.

Milli Məclisə 2020-ci ilin fevralında keçirilən növbədənkənar seçkilər zamanı baş vermiş qanun pozuntularına görə Mərkəzi Seçki Komissiyası 4 dairənin nəticələrini ləğv edib. Beləliklə, nəticələri ləğv edilən dairələrdə lider olan namizədlər – Hüseynbala Mirələmov, Rauf Arifoğlu, Hadı Rəcəbli və Çingiz Qənizadə mandatlarını qazanmadan itiriblər. Həmçinin deputat Fəttah Heydərov 2020-ci ildə vəfat edib.

Bundan başqa, 2022-ci ildə deputat Eldəniz Səlimov polisi döydüyünə görə mandatdan məhrum olmaqla yanaşı, 3 il 6 ay müddətinə həbs olunub. 2022-ci ildə isə Şahin Seyidzadə “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri təyin edilməsi ilə bağlı deputat mandatına xitam verilib.

Beləliklə, artıq 3 ildir deputat yerləri boş qalır. Seçki Məcəlləsinə görə, 1 deputatın 50 mindən çox seçicini təmsil eddiyini nəzərə alsaq, demək 400 mindən çox seçici deputatsız qalıb.

Seçki Məcəlləsində yer alan müddəalara görə, boş qalan depuat yerlərinə Mərkəzi Seçki Komissiyası tərəfindən təyin olunan müddətdə seçkilər keçirilməlidir. Amma bu müddəa uzun müddətdir nədənsə həyata keçirilmir.

Deputat Fazil Mustafanın sözlərinə görə, millət vəkili vəfat edərsə, onun yerinə operativ seçki keçirilməlidir.

Bəs boş qalan deputat yerlərinə niyə seçki keçirilməyib? Mərkəzi Seçki Komissiyasından məsələ ilə bağlı məlumatlarının olmadığı bildirilib.