ABŞ hərbi təyyarəsi Zvartnots aeroportuna endi | Caliber.Az-dan təcili məlumat

“Flightradar” qlobal uçuş izləmə xidmətinin məlumatına görə, avqustun 2 və 3-də ABŞ-nin Rumıniya və Yaxın Şərqdəki hərbi bazalarından Ermənistan istiqamətində 2 hərbi təyyarə yola düşüb.

Caliber.Az etibarlı mənbələrə istinadən ABŞ Silahlı Qüvvələrinə məxsus “Boeing C-17” hərbi yük təyyarəsinin şəxsi heyət və hərbi yüklərlə birlikdə Zvartnots hava limanına endiyini xəbər verib.

Bildirilib ki, aprelin 5-də Brüsseldə Ermənistan-Aİ-ABŞ arasında imzalanmış sənədin hərbi əməkdaşlığı nəzərdə tutan məxfi hissəsinə uyğun olaraq, Ermənistan Silahlı Qüvvələri üçün ABŞ istehsalı olan yeni nəsil silahlar – snayper tüfəngləri, gecəgörmə cihazları, xüsusi rabitə vasitələri, zirehli texnika gətirilib. Eləcə də Ermənistan xüsusi təyinatlıları üçün ABŞ ordusunda istifadə edilən mini-hücum pilotsuz təyyarələri, kiçik ölçülü minalar və digər döyüş sursatlarının da gətirildiyi bildirilir.

Caliber.Az-ın məlumatına görə, bundan əvvəl ABŞ Ermənistan xüsusi təyinatlıları üçün bu sursatlardan istifadə üzrə təlimlər təşkil edib. Bundan sonra Ermənistan tərəfi silahları real şəraitdə sınaqdan keçirmək üçün Kəlbəcər istiqamətində Azərbaycan ordusunun bölmələrinə qarşı hərbi təxribat törədib.

ABŞ hərbi yük təyyarələri ilə Ermənistana gətirilən külli miqdarda silah və sursatın yerli relyef və hərbi şəraitə uyğunlaşdırıldığı bildirilir. Bu zaman Aİ missiyasının Azərbaycan Ordusunun mövqeləri ilə bağlı topladığı kəşfiyyat məlumatlarından istifadə edilib.

Caliber.Az onu da öyrənib ki, iki təyyarədən birində İran ərazisindən buraxılan raketlərin və digər təyyarələrin trayektoriyalarını izləyən xüsusi alətlər olub. Bu zaman İran ərazisindən İsrailə mümkün hücum riski xüsusilə nəzərə alınıb. Gətirilən qurğular Ermənistanın İranla sərhədində yerləşdiriləcək.

Ancaq bu da hamısı deyil. ABŞ təbii olaraq bu missiyanı erməni hərbçilərinə həvalə etməyib, cihazları idarə etmək üçün ölkəyə 30-50 ABŞ-li mütəxəssis də gətirib. Rusiya və İranın diqqətini İranla sərhəddə yerləşdiriləcək şəxsi heyətdən yayındırmaq məqsədilə hərbçilər xüsusi olaraq seçilib – onların əksəriyyəti Amerika ordusunda xidmət edən erməniəsilli ABŞ vətəndaşlarıdır, həmçinin postsovet ölkələrindən ABŞ-a köçmüş slavyan və Qafqaz mənşəli insanlar, şəxsi heyət Ermənistan Silahlı Qüvvələrinin hərbi geyimi ilə təchiz olunub və Ermənistan ordusunun Zəngəzurdakı hərbi bazasında yerləşdirilib.