ABŞ Putini devirmək istəyir

“Mərkəzi Kəşfiyyat İdarəsinin bu addımı onu göstərir ki, ABŞ açıq şəkildə Rusiya Prezidenti Vladimir Putini zəiflətmək və devirmək istəyir”.

Bunu rusiyalı politoloq Darya Qrevtsova ABŞ-nin Mərkəzi Kəşfiyyat İdarəsinin rus dilində video hazırlayıb, “Telegram” kanalında paylaşaraq rusiyalıları casusluğa dəvət etməsinə münasibət bildirərkən deyib.

Politoloqun sözlərinə görə, məxfi məlumatlara əlləri çatan Rusiya vətəndaşlarının idarəyə müraciətləri ABŞ-nin işini daha da asanlaşdıracaq. Amerikalılar bu insanların vasitəsilə daha rahat şəkildə lazımi informasiyanı əldə edəcəklər. Daha sonra isə həmin məxfi məlumatları Rusiya Federasiyası və rəhbərliyə qarşı istifadə edəcəklər.

“Gördüyümüz kimi, bunları Ukrayna deyil, Mərkəzi Kəşfiyyat İdarəsi həyata keçirir. İndiyə qədər deyirdik ki, müharibə Rusiya ilə Ukrayna arasında yox, Rusiya ilə ABŞ arasında gedir. İndi baş verənlər dediklərimizi təsdiqləyir. ABŞ-də isə bunu artıq gizlətmirlər”, – deyə o əlavə edib.

Qeyd edək ki, layihədə iştirak edən Mərkəzi Kəşfiyyat İdarəsinin rəsmiləri CNN-ə açıqlamalarında bildiriblər ki, Rusiyanın Ukraynaya qarşı törətdiyi hərbi təcavüzə cavab olaraq ABŞ belə bir tarixi addım atmaq qərarına gəlib. Rusiyalılar üçün unikal fürsət yaradılıb ki, ABŞ ilə birbaşa əlaqəyə keçə bilsinlər. “Biz rusiyalılara öz ana dillərində çatdırmaq istəyirik ki, onların yanındayıq, nələr yaşadıqlarını bilirik. Çəkinmədən bizə müraciət etsinlər”, – deyə açıqlamada qeyd edilib.