Agentin ifşası ilə bağlı yeni təfərrüat açıqlandı

Azərbaycanda iki fransalı diplomatın “persona-non-grata” elan edilməsi və bu ölkədən çıxarılması ilə başlayan səs-küylü “casus qalmaqalı”na dair yeni təfərrüatlar məlum olub.

“Report” Fransanın “L’Opinion” nəşrinə istinadən xəbər verir ki, əvvəlcə heç kəs Martin Rayanın saxlanılması və 4 ay müddətinə həbsini Azərbaycan xüsusi xidmət orqanlarının Bakıda fransalı casus şəbəkəsinin ifşasına dair açıqlaması ilə əlaqələndirməyib. Lakin daha sonra məlum olub ki, ötən il dekabrın 4-dən həbsdə olan M.Rayanın Azərbaycandan çıxarılan diplomatlarla birbaşa əlaqəsi olub.

Nəşrdə o da vurğulanıb ki, M.Rayanın Fransa və Böyük Britaniya vətəndaşlığı olub, 4 il Bakıda yaşayıb və hətta azərbaycanlı qızla nişanlanıb. O, “Merkorama” adlı kiçik şirkət quraraq ixrac-idxalla, xüsusən şərab ticarəti ilə məşğul olub, ancaq siyasətlə maraqlanmayıb.

Buna baxmayaraq, Fransa xüsusi xidmət orqanlarının nümayəndələri M.Rayanın iradəsinə zidd olaraq onu üçüncü ölkələr haqqında məlumatların toplanması və ötürülməsinə cəlb edib.

Xəbərə görə, o, səfirliyin “Frederik” və “Loran” adlı əməkdaşları ilə isti, hətta mehriban münasibətlər saxlayırdı. Bakını tərk edən “Loran”ı əvəz edən “Andre” həbsdə ikən M.Rayanla görüş istəyib. Söhbət zamanı “Andre”nin M.Rayana siyasi məsələlərlə bağlı həddən artıq çox sual verdiyi də məlum olub.

Məqalədə vurğulanıb ki, Martinin səfirliklə əlaqələri ictimaiyyətə açıq olan sadə məlumatların, xüsusən də İran və Türkiyə ilə bağlı informasiyaların toplanılmasına və ötürülməsinə çevrilib.

Müəllifin sözlərinə görə, Azərbaycan xüsusi xidmət orqanları iki diplomatı, o cümlədən “Andre”ni şahid qismində dindirmək istəyib, lakin bundan imtina edildiyinə görə onların hər ikisi ölkədən çıxarılıb.

"Görünən odur ki, Fransanın “diplomatlar”ı Fransa Xarici İşlər Nazirliyindən daha çox Fransa Xarici Təhlükəsizlik Baş İdarəsinə hesabat veriblər. Onların kimliyi isə açıqlanmayıb. Ola bilsin, Martin Rayan hətta özünün də xəbəri olmadan həmin idarənin “fəxri müxbir”i seçilib, amma o, Fransa agenti olmayıb”, – deyə nəşrdə qeyd edilib.