Aİ missiyası hərbçimizin əsir götürüldüyü Laçın ərazisində

Rəsmi Bakı Avropa İttifaqının Ermənistandakı “missiyası”nın bir qrupunun təşkilatın bayrağı və emblemi olan beş avtomobillə Ermənistan-Azərbaycan şərti sərhədinə gəlməsini qeydə alıb.

Bu barədə Caliber.az öz mənbələrinə istinadla xəbər verir.

Bildirilib ki, karvan Arazdəyən qəsəbəsində şərti sərhədin bu hissəsində gərginlik səbəbindən tikintisi dayandırılmış metallurgiya zavoduna, eləcə də Paruyr Sevak kəndinin cənub-qərbindəki əraziyə yollanıb. Məlumata görə, 20-yə yaxın mülki geyimli şəxs ərazini müşahidə edib, foto və video çəkib.

Qeyd edək ki, missiyanın regiona bu səfəri əvvəlcədən planlaşdırılmayıb və bu, Azərbaycan tərəfinə təqdim olunan monitorinq cədvəlinin tarixi, vaxtı, marşrutu və koordinatlarına uyğun gəlmir. Bildirilib ki, bundan sonra avropalı kəşfiyyatçılar itkin düşmüş hərbçimizin ermənilər tərəfindən əsir götürüldüyü Laçın rayonuna doğru gediblər.

Əldə edilən məlumata görə, Avropa kəşfiyyatçıları metallurgiya zavodunun tikintisini bərpa etməyə çalışacaqlar.

Xatırladaq ki, Ermənistan tərəfi ESPO Konvensiyasını pozaraq sözügedən müəssisənin tikintisini aparmağa çalışır, bununla da Azərbaycanın və bütün regionun ekologiyasını təhlükə altına alır. Onun tikintisinə Qərb sərmayələri yatırılıb və vəziyyətin bu istiqamətdə gərginləşməsi də Qərbin Cənubi Qafqazda destruktiv hərəkətləri modelinə uyğun gəlir.

“Dərhal xəbərdarlıq edirik: bu zərərli obyekt Azərbaycanın sərhədində tikilsə, onun perimetrində olacaq hər kəs erməni hərbçilər və sərhədlərimizin yaxınlığında möhkəmlənmiş Avropa neosəlibçilərinin dəstəsi ilə birlikdə məhv ediləcək”, – deyə məlumatda qeyd olunub.