Almaniya səfiri Gəncəyə gedib

Almaniyanın Azərbaycandakı səfiri Ralf Horlemann Gəncəyə səfər edib.

Alman səfir Ermənistan silahlı qüvvələrinin Gəncəni raket atəşinə tutması zamanı dağılan əraziləri gəzib, günahsız mülki insanlara qarşı həyata keçirilən hərbi cinayətlərin nəticələri ilə yerində tanış olub.

Səfirə məlumat verilib ki, hazırda dayandığı məkan 44 günlük Vətən müharibəsi zamanı – 2020-ci ilin oktyabrın 11-də ballistik raketlə hədəfə alınıb.

Bildirilib ki, Azərbaycanın haqq savaşı dövründə dəfələrlə raket hücumuna məruz qalan Gəncə şəhəri cəbhə bölgəsindən 60 km uzaqlıqda yerləşir. Bu şəhərin yaxınlığında heç bir hərbi obyekt yerləşməyən yaşayış massivlərinə 8 dəfə atılan raket böyük dağıntılara səbəb olub.

Səfirin diqqətinə çatdırılıb ki, Gəncəyə raket atılması nəticəsində aralarında çox sayda körpə olmaqla, 26 nəfər mülki şəxs faciəvi şəkildə həlak olub, azyaşlılar valideynlərini itiriblər.