Almaniya XİN başçısı COP29-da emissiyaların azaldılmasının önəmini vurğuladı

“Avropa nümayəndə heyəti iqlim maliyyələşdirilməsi üzrə intensiv danışıqları davam etdirir”.

Bunu Almaniyanın xarici işlər naziri Annalena Berbok deyib.

O bildirib ki, iqlim maliyyələşdirilməsi CO2 emissiyalarının azaldılması olmadan mümkün deyil, onların azaldılması isə bütün ölkələrin bunu həyata keçirə bilməsi üçün maliyyə təminatı tələb edir:

“Bu kontekstdə biz Avropa nümayəndə heyəti olaraq mətn üzərində intensiv danışıqları davam etdiririk. Bu, keçən il güclü və qətiyyətlə razılaşdırılmış əsaslarla fəaliyyətimizi qurmaq deməkdir: bərpa olunan enerji mənbələrinin inkişaf sürətinin üçqat artırılması, enerji səmərəliliyinin ikiqat artırılması və ən əsası köhnəlmiş qalıq yanacaq növlərindən imtina yollarının müəyyənləşdirilməsi.

Bu, hazırda səfərbər edilən vəsaitlərin enerji keçidində geridə qalan ölkələrdə həmin keçidi sürətləndirməyə yönəldilməsi üçün kritik əhəmiyyət daşıyır. Həmçinin enerji saxlama sistemlərinin inkişafı, şəbəkələrin tikintisi və hələ də kömür elektrik stansiyalarının fəaliyyət göstərdiyi ölkələrdə kömürdən imtina üçün şəraitin yaradılmasını da əhatə edir. Bu artıq sənayecə inkişaf etmiş ölkələrdə, xüsusilə Avropada baş verir”.