Almaniyada azərbaycanlılarla bağlı xatirə lövhəsinin açılış mərasimi | Səfir çıxış etdi

Azərbaycanın Almaniyadakı səfirliyi tərəfindən bu ölkənin Zaksenhauzen əsir düşərgəsində azərbaycanlı əsirlərə həsr olunan xatirə lövhəsinin açılış mərasimi keçirilib.

Azərbaycan və alman dillərində hazırlanan xatirə lövhəsi Zaksenhauzen Memorial Kompleksinin divarına həkk edilib.

Berlin yaxınlığında yerləşən Zaksenhauzen əsir düşərgəsində 1936–1945-ci illərdə 200 mindən çox insan saxlanılıb. Onminlərlə əsir dəhşətli işgəncələr, dözülməz şərait nəticəsində həlak olub və ya nasistlər tərəfindən amansızlıqla qətlə yetirilib.

Ölkəmizin Almaniyadakı səfirliyi tərəfindən Zaksenhauzen arxivlərində aparılan araşdırmalar nəticəsində Azərbaycan əsilli məhbusların da burada saxlanıldığı aşkar edilib və Memorial Komplekslə xatirə lövhəsinin açılmasına dair razılıq əldə olunub.

Mərasimdə çıxış edən ölkəmizin Almaniyadakı səfiri Nəsimi Ağayev Azərbaycanın faşizm üzərindəki qələbənin əldə olunmasında misilsiz töhfələrindən söz açıb. Səfir müharibədə 700 min azərbaycanlının ön cəbhədə faşizmə qarşı döyüşdüyünü, onlardan 300 mininin həlak olduğunu qeyd edib.

Nəsimi Ağayev İkinci Dünya müharibəsində Almaniyadakı əsir düşərgələrində saxlanılan azərbaycanlıların taleyinin araşdırılması və onların xatirəsinin əbədiləşdirilməsinin səfirliyin daim diqqət mərkəzində olduğunu vurğulayıb.