Atamı, anamı və qardaşımı ermənilər Xocalıda girov götürdülər | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Həyat Hekayəsi” verilişinin növbəti buraxılışı hazırlanıb.

“Ailəmiz Göyçədən Gəncəyə, oradan da Şuşaya və Xocalıya dörd dəfə köç edib” adlı veriliş atası, anası və qardaşı Xocalı faciəsində itkin düşən, Qərbi Azərbaycanın Göyçə mahalının Basarkeçər rayonunun Qaraqoyunlu kənd sakini Tahir Seyidovun həyat hekayəsinə həsr olunub.

T.Seyidov erməni vəhşiliyindən söz açaraq bildirib ki, nənəsi ona 1905-ci ildə ermənilərin onları kənddən necə qovmasından danışıb:

“Ermənilər silahla kəndə hücum ediblər. Kənd camaatı Kəlbəcər rayonu ilə həmsərhəd olan Çalmalı dağını aşanda qışda borana-qara düşüb və xeyli insan ölüb. Belə hadisələr Xocalıda da yaşandı.

1988-ci ildə ermənilər insanları öz yurdundan qovanda atam Hidayət Bəhrəm oğlu Allahverdiyev, anam Simuzər Hüseynalı qızı Allahverdiyeva, qardaşım Bəhrəm Hidayət oğlu Allahverdiyev Gəncəyə, Göygölə, Şuşaya, sonra da Xocalı şəhərinə köçüblər.

Onlar Xocalı hadisələri baş verəndə erməni vandalizminə tuş gəldilər. Ermənilər atamı, anamı və qardaşımı girov götürüblər. İndiyədək onlardan heç bir xəbərimiz yoxdur. Onların adları Xocalı şəhidləri kimi qeyd olunub. Bu, ermənilərin xalqımıza, mənim ailəmə qarşı etdiyi böyük vəhşilikdir. Qaçqınlıq bizə çox böyük zərbə vurdu, ailəmi itirdim”.