ATƏT-dən Vaşinqton görüşünə reaksiya

ATƏT Azərbaycan-Ermənistan razılaşmasından məmnunluğunu ifadə edib.

Təşkilatdan bildirilib ki, avqustun 8-də Vaşinqtonda imzalanan razılaşmaları müsbət qarşılayır və ABŞ-nin bu məsələdəki rolunu təqdirəlayiq hesab edir.

ATƏT Azərbaycan və Ermənistanı münasibətləri normallaşdırmaq və sülhə nail olmaq üçün mümkün olan hər şeyi etməyə çağırır, eləcə də hər iki ölkəyə stabillik və qalıcı sülh gətirən bütün səyləri dəstəkləməyə, əldə olunan razılaşmaların icrasına dəstək verməyə hazır olduğunu bəyan edib.

NATO da öz növbəsində Vaşinqton görüşündə imzalanan sənədlərə reaksiya verib. Təşkilat Azərbaycan və Ermənistanın sülh istiqamətində əldə etdiyi irəliləyişi alqışladığını söyləyib. Bu barədə NATO mətbuat katibi Allison Hart sosial şəbəkə hesabında bəyanat verib.

“Biz Ermənistan və Azərbaycan arasında sülhə doğru irəliləyişdən məmnunuq. Prezident Trampa sülh üçün çalışdığına görə təşəkkür edirik. Bu regional təhlükəsizlik və normallaşma prosesi üçün mühüm bir addımdır. NATO tərəfdaşları olan Azərbaycan və Ermənistanla işləməyə davam edəcək”, – deyə bəyanatda qeyd edilib.