Avropadan Çinin yüksəlişi ilə bağlı açıqlama

Avropa İttifaqının xarici siyasət və təhlükəsizlik məsələləri üzrə ali nümayəndəsi Cozef Borel İttifaqın Çinin yüksəlişindən qorxmadığını bildirib. Eyni zamanda nümayəndə rəsmi Pekini sülh və təhlükəsizlik məsələlərində məsuliyyəti öz üzərinə götürməyə çağırıb.

Bu barədə Avropa diplomatiyasının başçısı Avropa İttifaqının rəsmi səhifəsində yazdığı bloqda bildirib. Cozef Borel Çinə səfərini təxirə saldığı üçün çıxış nitqini yazılı şəkildə ifadə edib.

“Çin və Avropa İttifaqı arasında güclü iqtisadi əlaqələr mövcuddur. Bununla belə, ittifaqla Çin arasında azaldılmalı olan natarazlıq da var”, – deyə ali nümayəndə əlavə edib. Borel bildirib ki, dünya fövqəladə iqlim dəyişikliyi və koronavirus pandemiyasının nəticələri ilə bağlı tədbir görməlidir.

Ali nümayəndə Avropa İttifaqının “vahid Çin” siyasətinə sadiq qaldığını, lakin Çinin status-kvonu güc yolu ilə dəyişdirmə cəhdini qəbul etməyəcəyini bildirib. O həm də Rusiya-Ukrayna müharibəsi ilə bağlı Çinə məsləhət verib və bildirib ki, rəsmi Pekin münaqişənin siyasi həllinə kömək etməsə, İttifaqla Çinin münasibətləri pozula bilər.