Aytən Cavanşir Makrona səsləndi | Bacarırsınızsa, bunun üçün çarpışın!

Gənc yazar Aytən Cavanşir Fransa Prezidenti Emmanuel Makrona müraciət edib.

Azərbaycanlı gənc yazarın sosial şəbəkə hesabında paylaşdığı müraciətini təqdim edirik:

“Fransa mənim üçün ruhumun yeniləndiyi məkandır. Dili, incəsənəti, insanları, küçələri, Senası…

Bu gün ölkələrimiz arasında münasibətlərin korlanmasını istəməyən bəlkə də ilk insanlardanam. Çox təəssüf ki, heç cür sülhə razılaşmayan qüvvələr oyunbazlıqla məşğul olaraq ortada Azərbaycana qarşı absurd dram yaradır. Uduzan haqsız olsa da, qisasla yaşaya bilər, bunu anladım. Fəqət siz, cənab Prezident – müsyö Makron, sizə təvazökar bir sualım olacaq. Hər siyasətçi tarixi mütləq ki, əzbər bilməlidir və bir çox hallarda dəbdə olmasa da, hər siyasətçi ədaləti, həqiqəti və insanlığı uca tutmalıdır.

Odur ki, ən sevdiyim dillərdən biri olan fransızcada özünüzə bu sualı ünvanlayın: Cənab Makron, siz 90-cı illərdə harada idiniz? Daha dəqiq desək, 1992-ci ildə siz harada idiniz?

İndi ittiham etdiyiniz ölkə o zaman sizin bu qədər şiddətlə və hər cür müdafiə etdiyiniz şəxslərin törətdiyi dəhşətli terror aktları ucbatından sağ qalmaq uğrunda mübarizə aparırdı. Bacarırsınızsa, sülhün əldə olunmasına yol açın, bunun üçün çarpışın, bunun mübarizəsini aparın!”.