Ayxan Hacızadə Fransaya sərt səsləndi | Daxili işlərimizə...

“Aprelin 29-da Fransanın daxili işlər naziri Jerar Darmaninin Fransa Milli Assambleyasında Azərbaycan-Yeni Kaledoniya əlaqələrindən danışarkən ölkəmizə qarşı səsləndirdiyi əsassız və ittiham xarakterli iddiaları qətiyyətlə rədd edirik”.

Azərbaycan Xarici İşlər Nazirliyinin mətbuat katibi Ayxan Hacızadə fransalı nazirin ölkəmizə qarşı səsləndirdiyi iddialara münasibət bildirərkən belə deyib.

Onun sözlərinə görə, Azərbaycanı Yeni Kaledoniyanın timsalında guya separatçılığa dəstək verməkdə günahlandıran Fransanın daxili işlər naziri unudur ki, məhz Fransa tərəfi uzun müddət ərzində Azərbaycanda aqressiv separatizmi dəstəkləyən addımlar atıb.

O qeyd edib ki, Fransanın hakim partiyasının təşəbbüsü ilə ölkə parlamenti Azərbaycanın ərazi bütövlüyü və suverenliyini sual altına qoyan, separatçı rejimi tanıyan qərar və qətnamələr qəbul edib.

“Fransanın daxili işlər naziri Azərbaycana qarşı erməni əhalinin qətliamı kimi heç bir əsası olmayan gülünc və ucuz qarayaxmaya cəhd göstərmək əvəzinə ölkəsinin uzun illər boyu həyata keçirdiyi və hazırda da davam etdirdiyi müstəmləkəçilik siyasəti çərçivəsində yerli xalqlara qarşı törətdiyi insanlıq əleyhinə cinayətləri, vəhşicəsinə qətlə yetirdiyi milyonlarla günahsız insanı unutmamalıdır.

Fransa hökumət rəsmisinin Azərbaycanın konstitusional dövlət quruluşu haqqında beynəlxalq dövlətlərarası münasibətlər baxımından heç bir etik çərçivəyə sığmayan təhqir dolu ifadələrdən istifadə etməsi qəbuledilməzdir.

Fransadan bir daha Azərbaycanın daxili işlərinə qarışmamağı və ölkəmizə qarşı əsassız iddialar səsləndirməyə son qoymağı tələb edirik. Ölkəmizin milli maraqlarının qorunması üçün bundan sonra da bütün zəruri tədbirlərin görüləcəyini bir daha bəyan edirik", – deyə mətbuat katibi vurğulayıb.