Azərbaycan AŞPA üçün əhəmiyyətli ölkədir | Araxamiya Ukraynanın mövqeyini açıqladı

Avropa Şurası Parlament Assambleyasında Azərbaycana qarşı qərəzli münasibətlərdən sonra nümayəndə heyətimizin bu qurumda fəaliyyətini dayandırması beynəlxalq gündəmin diqqətini çəkib.

Ukrayna Ali Radasında hakim Xalqın Xidmətçisi partiyasının fraksiya rəhbəri, beynəlxalq danışıqlarda Ukrayna nümayəndə heyətinə rəhbərlik edən David Araxamiya Baku TV-nin Şərqi Avropa bürosuna rəsmi Kiyevin bu mövzuda mövqeyini açıqlayıb.

“AŞPA-da baş verən hadisələr təəssüf doğuran bir anlaşılmazlıqdır. Bununla bağlı emosiyaları kənara qoymaq lazımdır. Bizim Xarici Əlaqələr Komitəsi həm Azərbaycan tərəfinə, həm də AŞPA-ya müraciət etmək təşəbbüsü ilə çıxış etdi.

Azərbaycan və onun bu qurumdakı nümayəndə heyəti uzun illər, onilliklər ərzində çox səmərəli işləyir, Avropanın bütün dəyərlərini, multikulturalizmi, demokratik dəyərləri və s. bölüşür. Buna görə də bizə elə gəlir ki, bu anlaşılmazlıq bir az da hər iki tərəfin emosiyalarından qaynaqlanır. Biz belə hadisələrin baş verdiyini görəndə anlayırıq ki, birlik çox vacibdir. Buna görə də istəyirik ki, müharibə şəraitində olan ölkə olaraq hər iki tərəfə müraciət edək. Onlar danışıqlar masası arxasına əyləşib həll yolu tapsınlar”, – o bildirib.

Qeyd edək ki, Ukrayna parlamentinin deputatları da bu mövzuda Avropa Şurasında irad bildiriblər.