Azərbaycan düşmənçilik səhifəsini çevirmək əzmindədir

“Ümidvaram ki, 2023-cü il Azərbaycanla Ermənistan arasında münasibətlərin normallaşmasında irəliləyiş ili olacaq”.

Bunu Prezident İlham Əliyev Rusiya xarici işlər naziri Sergey Lavrovla görüşündə bildirib. İ.Əliyev Azərbaycanla Ermənistan arasında dövlətlərarası münasibətlərin nizamlanması məsələsində Rusiyanın xüsusi rola malik olduğunu deyib.

“Ötən il bu istiqamətdə mühüm səy göstərilib, gələcək sülh müqaviləsinin konseptual xarakterini, məhz iki ölkənin ərazi bütövlüyünün və suverenliyinin qarşılıqlı tanınmasını müəyyən edən sənədlər qəbul olunub. Bu sənədlər sülh müqaviləsinə nail olmaq üçün istifadə edilə bilən təməldir. Hər halda biz bu düşmənçilik səhifəsini tezliklə çevirmək və Cənubi Qafqaza sülhü qaytarmaq üçün Ermənistan tərəfi ilə, bizim dostumuz və qonşumuz Rusiya tərəfi ilə müsbət və konstruktiv iş aparmaq əzmindəyik”, - deyə o əlavə edib.