Azərbaycan, Ermənistan və Rusiya Baş nazir müavinlərinin görüşü planlaşdırılır

Regionda nəqliyyat kommunikasiyalarının açılması ilə bağlı qalan məsələlərin həlli üçün Azərbaycan, Ermənistan və Rusiya Baş nazirlərinin müavinlərinin gələn həftə görüşü planlaşdırılır.

Bunu Rusiya Prezidenti Vladimir Putin Moskvada Azərbaycan, Rusiya və Ermənistan liderlərinin üçtərəfli Zirvə görüşündə deyib.

“İndi biz razılaşdıq ki, yaxın gələcəkdə, bir həftə sonra mən həmkarlarımdan xahiş edəcəyəm ki, bu tarix barədə razılığa gəlsinlər, Azərbaycan, Rusiya və Ermənistan Baş nazirlərinin müavinləri görüşəcəklər və indiyə qədər tənzimlənməmiş, belə demək mümkünsə, suallar aradan qaldırılacaq”, – deyə V.Putin bildirib.

Rusiya Baş nazirinin müavini Aleksey Overçuk Ermənistanla Azərbaycan arasında hansı texniki həll olunmamış məsələlərin qaldığını açıqlayıb. Üçtərəfli işçi qrupun rusiyalı həmsədri bildirib ki, bunlar texniki, lakin çox vacib detallardır.

“Söhbət Azərbaycanla Ermənistan arasında sərhədi keçmə prosedurundan gedir. Sərhəd və gömrük nəzarəti necə aparılacaq? Bu, Baş nazirin müavinlərinin bir həftə sonra Moskvada müzakirə edəcəyi suallardır”, – deyə A.Overçuk bildirib.