Azərbaycan nümayəndə heyəti AZAL-ın təyyarəsinin düşdüyü qəza yerinə gedir

“Azərbaycan Hava yollarına” məxsus Bakı-Qroznı reysini həyata keçirən təyyarə Aktau şəhəri yaxınlığında qəzaya uğrayıb.

Baş verən hadisəni yerində araşdırmaq məqsədilə Azərbaycan Prezidenti İlham Əliyevin tapşırığı ilə rəqəmsal inkişaf və nəqliyyat naziri, fövqəladə hallar naziri, Baş prokurorun müavini, səhiyyə nazirinin müavini, Dövlət Mülki Aviasiya Agentliyinin direktorunun müavini, AZAL-ın vitse-prezidenti və digər aidiyyəti dövlət orqanlarının nümayəndələri Qazaxıstanın Aktau şəhərinə yola düşüblər.

Bu arada, təyyarə qəzası ilə bağlı Qazaxıstan Prezidenti Kasım-Jomart Tokayevin tapşırığı ilə Baş nazirin müavini Kanat Bozumbayevin rəhbərlik edəcəyi dövlət komissiyası yaradılıb. Bu barədə “Kazinform” məlumat yayıb.

Bildirilib ki, Tokayev Astanadan Aktauya həkimlərin göndərilməsi və zərərçəkənlərin lazımi dəstəklə təmin edilməsi haqqında sərəncam verib.

Qazaxıstanın Nəqliyyat Nazirliyindən bildirilib ki, hazırda Aktau Şəhər Hava Limanı açıqdır və ştat rejimdə fəaliyyət göstərir.