Azərbaycan nümayəndə heyəti beynəlxalq sərgidə | Nələr müzakirə edildi?

Türkiyədə səfərdə olan müdafiə naziri general-polkovnik Zakir Həsənov və Nazirliyin digər rəhbər heyəti “IDEF 2025” 17-ci Beynəlxalq Müdafiə Sənayesi Sərgisində iştirak edib.

Azərbaycan nümayəndə heyəti beynəlxalq sərgidə nümayiş etdirilən dünya üzrə müdafiə sənayesinin aparıcı şirkətlərinin istehsalı olan silah, texnika və hərbi təyinatlı vasitələrə baxış keçirib, onların rəhbər heyəti ilə görüşüb.

Görüş zamanı hərbi-texniki sahədə əməkdaşlığın müxtəlif aspektləri, inkişaf perspektivləri və qarşılıqlı maraq doğuran digər məsələlərə dair ətraflı fikir mübadiləsi aparılıb.

Sərgi çərçivəsində müdafiə nazirinin müavini – Baş direktor Aqil Qurbanov, Müdafiə Nazirliyinin tabeliyində fəaliyyət göstərən MİRAS Hərbi-Sənaye Şirkəti MMC və Müdafiə Sənayesi Nazirliyinin tabeliyində fəaliyyət göstərən “Azərsilah” Müdafiə Sənayesi Holdinqi” QSC-nin nümayəndələrinin iştirakı ilə bir sıra müqavilələr imzalanıb.