Azərbaycan-Paraqvay əlaqələrinin inkişafı | Prezident yeni səfiri qəbul etdi

Prezident İlham Əliyev fevralın 13-də Paraqvayın ölkəmizdə yeni təyin olunmuş fövqəladə və səlahiyyətli səfiri Seferino Valdez Peraltanın etimadnaməsini qəbul edib.

Səfir etimadnaməsini dövlət başçısına təqdim edib. Prezident İlham Əliyev səfirlə söhbət edib.

Səfir Seferino Valdez Peralta Paraqvayın Prezidenti Santyaqo Penyanın salamlarını dövlət başçısına çatdırıb. İlham Əliyev salamlara görə minnətdarlığını bildirib, onun da salamlarını Paraqvayın dövlət başçısına çatdırmağı xahiş edib.

Görüşdə Azərbaycanla Paraqvay arasında parlamentlərarası, mədəni, humanitar əlaqələrin inkişaf etdirilməsinin vacibliyi bir daha qeyd olunub, Paraqvay parlamentində Azərbaycanla dostluq qrupunun tezliklə ölkəmizə səfər edəcəyi bildirilib, kənd təsərrüfatı, o cümlədən heyvandarlıq sahəsində əməkdaşlığın perspektivlərinə dair müzakirələr aparılıb.

Bildirilib ki, Paraqvay region ölkələrinə öz ixracının artırılması üçün Azərbaycanı logistik mərkəz kimi görür.

Söhbət zamanı SOCAR-la Paraqvayın neft şirkəti arasında təmasların olduğu qeyd edilib, ölkələrimizin biznes dairələrinin əlaqələrinin yaradılması məsələsi vurğulanıb.