Azərbaycan səfiri ABŞ-nin tanınmış televiziya kanalında qonaq oldu

Amerika Birləşmiş Ştatlarının tanınmış “Newsmax” telekanalında Vaşinqton Zirvəsinə həsr olunmuş xüsusi veriliş yayımlanıb.

Verilişin qonağı Azərbaycanın ABŞ-dəki səfiri Xəzər İbrahim olub.

Proqramda Prezident Donald Trampın vasitəçiliyi ilə Azərbaycan Prezidenti İlham Əliyev və Ermənistan Baş naziri Nikol Paşinyan arasında baş tutan Vaşinqton görüşünün əhəmiyyəti müzakirə edilib.

Aparıcı Rob Esperino imzalanan sənədin Cənubi Qafqaz və beynəlxalq təhlükəsizlik üçün mühüm mərhələ olduğunu bildirib.

Səfir Xəzər İbrahim görüşün rəmzi və siyasi baxımdan böyük əhəmiyyət daşıdığını, Trampın liderliyi sayəsində nəticəsiz qalan danışıqlarda real irəliləyişin əldə olunduğunu vurğulayıb.

Onun sözlərinə görə, bu sənəd bölgədə sülh və əməkdaşlıq üçün yeni imkanlar açır.

Proqramda Azərbaycanın tolerant və açıq cəmiyyət olması, yəhudilər, xristianlar və müsəlmanların tarixən harmoniyada yaşaması xüsusi qeyd olunub.

Səfir Azərbaycanın İsraillə enerji, iqtisadiyyat və texnologiya sahələrində sıx əməkdaşlıq etdiyini xatırladıb.

Aparıcı Trampın Nobel Sülh Mükafatına layiq olub-olmadığını soruşduqda Xəzər İbrahim onun qısa müddətdə Cənubi Qafqaz da daxil olmaqla bir çox regionda sülh təşəbbüslərinə imza atdığını və bu mükafata layiq olduğunu bildirib.