Azərbaycan UNESCO-nun Hökumətlərarası Komitəsinə üzv seçildi

Azərbaycan UNESCO-nun Mədəni Özünüifadə Müxtəlifliyinin Qorunması və Təşviqi üzrə Hökumətlərarası Komitəsinə 2025-2029-cu illər üzrə üzv seçilib.

Bu barədə Xarici İşlər Nazirliyi məlumat yayıb.

Bildirilib ki, seçki 2025-ci il iyunun 20-də UNESCO-nun mənzil-qərargahında “Mədəni özünüifadə müxtəlifliyinin qorunması və təşviqinə” dair 2005-ci il Konvensiyasının 10-cu Tərəflər Konfransı çərçivəsində baş tutub.

Məlumata görə, 2005-ci il Konvensiyasının həyata keçirilməsinə nəzarət edən əsas icra orqanı kimi Hökumətlərarası Komitənin 24 üzvü var və üzvlərin səlahiyyət müddəti 4 ildir.

“Azərbaycan daha əvvəl 2019-2023-cü illərdə Hökumətlərarası Komitədə təmsil olunub. Ölkəmizin sözügedən Komitəyə növbəti dəfə üzv seçilməsi Azərbaycanın mədəni müxtəlifliyinin qorunması, mədəni ifadə azadlığının təşviqi və bu sahədə beynəlxalq əməkdaşlığın gücləndirilməsi istiqamətində ardıcıl və məqsədyönlü siyasətinin, həmçinin bu sahəyə verdiyi yüksək önəmin bariz göstəricisidir”, – deyə məlumatda qeyd olunub.