Azərbaycan və Aİ arasında yeni saziş üzrə razılıq əldə olundu | Ceyhun Bayramovdan açıqlamalar

Doqquz ildən sonra Avropa İttifaqı ali nümayəndəsinin Azərbaycana səfər etməsi əlamətdar hadisədir.

Bunu xarici işlər naziri Ceyhun Bayramov Aİ-nin xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallasla keçirilən birgə mətbuat konfransında deyib.

Nazir bildirib ki, Kaya Kallasın səfəri Azərbaycan-Avropa İttifaqı münasibətlərinin inkişafına böyük töhfə verəcək.

Mətbuat konfransında çıxış edən xarici işlər naziri onu da qeyd edib ki, Azərbaycan və Avropa İttifaqı arasında yeni saziş üzrə yaxın vaxtlarda əməli addımlar atılması barədə razılıq əldə olunub.

Onun sözlərinə görə, Aİ ilə Azərbaycan arasında yeni sazişi əhatə edən məsələlərin 90-95 faizi razılaşdırılıb. Ceyhun Bayramov çıxışı zamanı Azərbaycanla Avropa arasındakı ticarət dövriyyəsindən də danışıb. Nazir qeyd edib ki, Azərbaycan qazı 12 ölkəyə ixrac olunur ki, onlardan 10-u Avropa ölkəsidir.

Ceyhun Bayramovun sözlərinə görə, Azərbaycanın növbəti illərdə Avropa İttifaqı ilə iqlim sahəsində əməkdaşlığı da genişlənə bilər.

Nazir Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallası Azərbaycan-Ermənistan normallaşma prosesi barədə məlumatlandırıb. Sülh sazişinin mətninin razılaşdırılması və bundan sonrakı mərhələdə Azərbaycanın Ermənistandan gözləntiləri barədə Aİ ali nümayəndəsinə ətraflı məlumat verilib.

Ceyhun Bayramov bildirib ki, Ermənistanda revanşist meyillərin hələ də olması ciddi narahatlıq doğurur. O qeyd edib ki, Ermənistan ciddi şəkildə silahlandırılır.