Azərbaycan və İran XİN rəhbərləri nələri müzakirə etdi? | Detallar açıqlandı

Xarici işlər naziri Ceyhun Bayramovla iranlı həmkarı Seyid Abbas Ərağçi arasında telefon danışığı baş tutub.

Xarici İşlər Nazirliyindən verilən məlumata əsasən, söhbət zamanı İsrailin İran ərazisinə qarşı başladığı əməliyyat nəticəsində yaranan vəziyyət müzakirə olunub. İranın xarici işlər naziri İsrail tərəfindən həyata keçirilən hücum, eləcə də İran tərəfindən atılan addımlar barədə məlumat verib.

Nazir Ceyhun Bayramov bölgədə vəziyyətin gərginləşməsindən narahatlıq ifadə edib. İran Silahlı Qüvvələrinin Baş Qərargah rəisi, digər rəsmi şəxslərin və İran vətəndaşlarının həlak olması ilə bağlı başsağlığı diləklərini çatdırıb. Nüvə obyektlərinin ətrafında mövcud vəziyyətin narahatlıq doğurduğunu vurğulayıb.

Mövcud problemləri yalnız beynəlxalq hüququn norma və prinsiplərinə uyğun olaraq, dialoq və diplomatik yollarla həll etməyin vacib olduğu diqqətə çatdırılıb.

Bununla yanaşı, Azərbaycan ərazisinin hər hansı bir ölkə tərəfindən üçüncü ölkəyə, o cümlədən qonşu və dost İrana qarşı istifadə edilməsinin mümkün olmadığı vurğulanıb. İranın hava məkanının bağlı olduğu nəzərə alınaraq Azərbaycanın quru sərhədindən istifadə etməklə müxtəlif ölkələrin və İranın nümayəndələrinə keçid üçün şərait yaradıldığı barədə məlumat verilib.

Münaqişənin geniş bölgəyə yayılması təhlükəsini nəzərə alaraq diplomatik səylərin bərpa edilməsinin əhəmiyyəti bir daha qeyd olunub.

Telefon danışığı zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb.