Azərbaycan və Suriya münasibətləri | İki ölkə arasındakı əməkdaşlıq əlaqələri

Artıq ərazi bütövlüyünü bərpa etmiş Azərbaycan xarici siyasətində nəzər nöqtəsini daha qlobal istiqamətdə inkişaf etdirir. Avropa, Mərkəzi Asiya yönündə aparılan fəal siyasət Yaxın Şərq regionunda da özünü göstərir.

Məsələn, tarixində yeni səhifə açılmış Suriya ilə qurulan əlaqələr və qarşılıqlı əməkdaşlıq formatına yenidən baxılması prinsipcə ölkəmizin mövqeyinin aydın təzahürüdür. Bütün bu addımlar həm də Türkiyə ilə sinxron şəkildə atılır.

Azərbaycan müharibədən sonra bərpa-quruculuq sahəsində unikal təcrübə əldə edib. Sözsüz ki, Suriya ölkəmizin bu təcrübəsindən də yararlana bilər. Qeyd edək ki, Azərbaycanla Suriya arasında müsbət əlaqələr tarixən mövcud olub, lakin Bəşər Əsəd rejimi bu əlaqələrin inkişafına imkan verməyib.

Bu gün Suriyanın keçid dövrü Prezidenti Əhməd Əl Şaraanın Azərbaycana işgüzar səfərə gəlməsi yeni dönəmdə əməkdaşlığımız sahəsində atılan daha bir addımdır. Bundan əvvəl Azərbaycan və Suriya prezidentləri Antalyada görüşmüşdülər. Analitiklər bildirirlər ki, bu əlaqələrin inkişaf etdirilməsinin müsbət gələcəyi var.

“Azərbaycanın Suriyanın neft-qaz sektorunda böyük işlər görməsi üçün perspektivlər var. Çünki ölkəmizin bu sahədə təcrübəsi mövcuddur. Eyni zamanda Suriyanın qonşuları, xüsusən də İsraillə normal münasibətlərinin qurulmasında Azərbaycanın böyük töhfələri ola bilər”, − deyə siyasi şərhçi Aydın Quliyev bildirib.

Ekspertlər vurğulayırlar ki, Azərbaycan qazı üçün dünyada artan rəqabət fonunda enerji ehtiyatlarımızın diversifikasiyası üçün imkanların genişləndirilməsi baxımından da Suriya ilə əlaqələr mühüm əhəmiyyət kəsb edir.