Azərbaycan və Tacikistan prezidentləri mətbuata bəyanatlarla çıxış etdi

Prezident İlham Əliyev və Tacikistan Prezidenti Emoməli Rəhmon mətbuata bəyanatlarla çıxış ediblər.

Dövlət başçısı ilin sonunda Emoməli Rəhmonun yenidən ölkəmizə səfər edəcəyini, noyabrda keçiriləcək iqlim konfransında iştiraka dəvət etdiyini və qəbul olunduğunu bildirib.

Dövlətlərarası münasibətlərin ən yüksək səviyyəyə çatdığını deyən Prezident İlham Əliyev münasibətlərin xarakterini, ruhunu, həmçinin xalqlarımızın iradəsini əks etdirən Strateji Tərəfdaşlıq Bəyannaməsinin qarşılıqlı fəaliyyətin bütün sahələrini əhatə etdiyini bildirib.

Bəyannamə ilə yanaşı, imzalanan digər sənədlərin də münasibətlərin müqavilə-hüquq bazasını xeyli möhkəmləndirdiyini əlavə edib. Sənaye kooperasiyası və nəqliyyat ilə bağlı məsələlər də diqqət mərkəzində olub.

Prezident İlham Əliyev Orta Dəhlizi və onun bir hissəsi olan Trans-Xəzər Nəqliyyat Dəhlizini Tacikistandan yükgöndərənlər üçün daha cəlbedici etmək məqsədilə logistika əlaqələrinə dair məsələlərin nəzərdən keçirildiyini bildirib.

Həmçinin geosiyasi dəyişikliklər, dünyadakı vəziyyət, regionlardakı şərait ilə bağlı məsələlər də müzakirə olunub. Təhlükəsizlik tədbirlərinin gücləndirilməsi və bu sahədə əməkdaşlığın inkişafı, təhsil, mədəniyyət və kənd təsərrüfatı ilə bağlı məsələlər nəzərdən keçirilib.

Tacikistan Prezidenti Emoməli Rəhmon isə bildirib ki, hökumətlərə 2025-ci ilədək iqtisadi əməkdaşlıq üzrə Tədbirlər Planının tam icrasına ciddi nəzarət etmək tapşırılıb.

Bundan əlavə, Emoməli Rəhmon 2025-ci ildə Tacikistanda Azərbaycan Mədəniyyət Günlərinin keçirilməsini və xalqlar arasında dostluq festivalının təşkil edilməsini təklif edib. Konstruktiv dialoqu davam etdirmək məqsədilə Emoməli Rəhmon azərbaycanlı həmkarını Tacikistana səfərə dəvət edib.