Azərbaycan və Tacikistan prezidentlərinin geniş tərkibdə görüşü keçirilib

Prezident İlham Əliyevin Tacikistan Prezidenti Emoməli Rəhmonla geniş tərkibdə görüşü keçirilib.

Ölkə başçısı bildirib ki, münasibətlərin inkişafında mühüm mərhələlərdən biri mayın 23-də imzalanan Strateji Tərəfdaşlıq Bəyannaməsidir.

Ticarət dövriyyəsinin hələ ki qaneedici olmadığını deyən Prezident İlham Əliyev müzakirə olunan və razılığa gəlinən məsələlərin ticarət dövriyyəsinin artmasına kömək edəcəyini bildirib.

Görüşdə nəqliyyat-logistika infrastrukturunun yeni imkanlarının nəzərə alınması ilə nəqliyyat sektorunda əməkdaşlıq da müzakirə olunub. Dövlət başçısı hesab edib ki, bu istiqamətdə səyləri birləşdirmək, addımları daha sıx əlaqələndirmək faydalı olacaq. Çünki Transxəzər nəqliyyat dəhlizi Avropa və Mərkəzi Asiya regionu üçün daha çox əhəmiyyət kəsb edir. Azərbaycan isə Avropa ilə Asiyanın qovşağında yerləşən birləşdirici ölkə kimi özünün nəqliyyat infrastrukturu ilə mühüm rol oynayır.

Emoməli Rəhmon da əminliyini bildirib ki, görüşlərin nəticələri ölkələrimizin əməkdaşlığını yeni inkişaf səviyyəsinə yüksəldəcək.

Azərbaycanın Tacikistanın etibarlı dostu və tərəfdaşı olduğunu deyən Emoməli Rəhmon bildirib ki, ölkələrimizi zamanın sınağından çıxmış münasibətlər birləşdirir.