Azərbaycan XİN Ermənistana cavab verdi

Azərbaycan Xarici İşlər Nazirliyi Ermənistan tərəfinin Prezident İlham Əliyevin Qərbi Azərbaycan İcması ilə görüşü zamanı səsləndirdiyi fikirləri təhrif edən əsassız bəyanatına münasibət bildirib.

Qeyd edilib ki, Ermənistan XİN-in Azərbaycanın bölgədə sülh və sabitlikdə maraqlı olmadığını, beynəlxalq hüququ pozduğunu iddia etməsi riyakarlıqdan başqa bir şey deyil. Habelə, Azərbaycanın Praqa və Soçi razılaşmalarını pozması, sülh prosesinə maneçilik törətməsi fikri əsassızdır.

“Görünən odur ki, Laçın yolunun fəaliyyətinin bərpa olunması barədə çağırışlar edən Ermənistan tərəfi qeyri-qanuni iqtisadi fəaliyyətə qarşı keçirilən etirazların onun bu istiqamətdəki fəaliyyətinə, Azərbaycan ərazisindən hələ də çıxarılmayan erməni silahlı qüvvələrinin təchizatına, Laçın yolundan minaların daşınması kimi hərbi təxribatlara maneçilik yaratmasından narahat olur. “Ermənistanın öz öhdəliklərinə zidd olaraq destruktiv fəaliyyəti davam etdirməsi, Azərbaycanın suverenliyinə və ərazi bütövlüyünə qarşı bəyanat və addımları bölgədə sülhün bərpasına xidmət etmir. Azərbaycan beynəlxalq hüququn ona verdiyi əsasla müvafiq sülh quruculuğu tədbirlərini davam etdirəcək”, - deyə Xarici İşlər Nazirliyinin bəyanatında deyilir.