Azərbaycana görə Avropanı qınadı: xarici şərhçidən sərt tənqid

Azərbaycanın öz suveren ərazilərində keçirdiyi uğurlu antiterror tədbirlərinin ardınca separatçı liderlərin həbs edilməsi dünyanın da gündəmindədir. Bəzi Qərb mediasının bu prosesə qərəzli yanaşması isə başadüşülən deyil.

Avstriyadan olan siyasi şərhçi Martin Malek Baku TV-nin Şərqi Avropa bürosuna təəssüflə bildirib ki, Avropa mediası bu uğurlu nümunəni yetərincə təbliğ etmir.

“Bu barədə alman dilli mətbuatda qısa məlumat yayıldı, amma burada əksər media qurumları artıq unudublar ki, Azərbaycan Qarabağ separatçılarının liderlərini həbs edib, separatizmlə mübarizədə örnək olub. Bunu təbliğ etmək lazımdır. Bu prosesin digər postsovet respublikalarında, xüsusən Moldovada, Ukraynada və Gürcüstanda separatizmə son qoymağa necə kömək edə biləcəyinə gəlincə, mən heç də elə düşünmürəm ki, o ölkələrdə bu proses belə uğurla təkrarlana bilər. Onlarda vəziyyət başqadır. Düşünürəm ki, separatizm güc tətbiqi ilə sonlandırılır, əks halda heç vaxt sona çatmır. Necə ki, Azərbaycan bunu artıq etdi”.

Moldova Silahlı Qüvvələrinin ehtiyatda olan polkovniki, hərbi-siyasi şərhçi Andrian Keptonar isə düşünür ki, Azərbaycanın bu uğurlu addımı digər ölkələrdəki separatçıları da düşündürməlidir:

“Onlar başa düşməlidirlər ki, Qarabağda olduğu kimi, Dnestryanı, Abxaziya və digər yerlərdə də bu aqibətlə üzləşmək mümkündür. Biz bunu Qarabağda, Ukraynada gördük. Dnestryanı münaqişəsinin də tezliklə həll ediləcəyinin şahidi olacağıq”.

Onu da vurğulayaq ki, Azərbaycan postsovet məkanında yeganə ölkədir ki, öz ərazisində separatizmə qalib gələrək suverenliyini bərpa edib.