Azərbaycanda son 7 ildə neçə sosial islahat paketi icra edilib? - Baku TV

“Bu gün insanların rifah halını yaxşılaşdırmaq üçün sosial siyasət daha dəqiq və şəffaf şəkildə həyata keçirilir”.

Bu fikri Prezident İlham Əliyev yerli televiziya kanallarına müsahibəsində səsləndirib.

Dövlət başçısı bildirib ki, sosial sahədə mövcud olmuş pozuntular və ədalətsizliklər aradan qaldırılıb, nəticədə genişmiqyaslı islahatlar icra olunub: “Son 7 il ərzində 5 sosial islahat paketi həyata keçirilib. Bu islahatlar 4 milyon insanı əhatə edir və təqribən 8 milyard manat vəsait yönəldilib”.

Prezident qeyd edib ki, maaşlar, pensiyalar və müavinətlər müntəzəm artırılır, sosial siyasət isə populizmə deyil, real iqtisadi imkanlara əsaslanır.

Dövlət başçısı məşğulluq məsələsinə də toxunaraq vurğulayıb ki, özünüməşğulluq proqramı 100 mindən çox insanı əhatə edib və işsizliyin azalmasına ciddi töhfə verib.

Prezident həmçinin şəhid ailələri və müharibə əlillərinə göstərilən dövlət qayğısını xüsusi qeyd edib: “Son illərdə 16 min şəhid ailəsi və müharibə əlili dövlət tərəfindən mənzillə təmin edilib, yüzlərlə hərbçi ən müasir protezlərlə təmin olunaraq normal həyata qayıdıb”.

Dövlət başçısı əlavə edib ki, son 20 ildə minlərlə məktəb və yüzlərlə xəstəxananın tikilməsi və əsaslı təmiri sosial siyasətin iqtisadi inkişafla ayrılmaz bağlılığını göstərir.