Azərbaycandan tapılan maddi mədəniyyət nümunələrini dünya bazarlarında satırlar

“Qərbi Azərbaycan Xronikası” layihəsi çərçivəsində “Qırğızıstanda böyük Alban izi” adlı veriliş efirə gedib.

Verilişdə tarix üzrə fəlsəfə doktoru, dosent Təvəkkül Əliyev işğal dövründə ermənilərin Qarabağ ərazisində apardıqları saxta qazıntılardan, eləcə də Qırğızıstanda Alban izlərindən bəhs edib.

O bildirib ki, işğal dövründə ermənilər Qarabağda bir neçə məntəqədə ardıcıl, uzun sürən qazıntılar aparıblar:

“Ermənilər Şahbulaq ərazisində 10 kilometrlik səngərlər qazıblar. Onlar Qarabağda tarixi abidələri talan edib, tapılan qiymətli əşyaları satıblar. Ağdərə ərazisində abidələri talan ediblər. Azərbaycandan tapılan maddi mədəniyyət nümunələrini dünya bazarlarında satırlar”.

Tarixçi erməni saxtakarlığından söz açaraq vurğulayıb ki, ermənilər antik Alban qalasına od vurub, yandırıblar:

“Neftlə zəngin olan Tərnöyüt kəndinin adını Tiqranakert, Qaçaq qalasını Kaçaxabert kimi təqdim edirlər”.

Onun sözlərinə görə, Küp qəbirləri haqqında Noneşvili adlı bir gürcü müəllif yazır ki, Azərbaycanda olan küp qəbirlərin sayı Ermənistan və Gürcüstanda olanlardan bir neçə dəfə çoxdur və küp qəbirlərin əsas məkanı məhz Azərbaycan ərazisi olub.

T.Əliyev sonda Qırğızıstanda böyük Alban izinin olmasından danışıb, türklərin Qafqaz ərazisində hökmranlığının eradan daha əvvələ getdiyini sübutlarla əsaslandırıb:

“Eradan əvvəl 2-ci, 3-cü əsrdən başlamış, Alban dövlətində mövcud olmuş etnomədəni xüsusiyyətlər bugünkü Azərbaycanda da yaşadılır. Albaniyada yaşayan tayfalar, xalqlar bu gün Azərbaycanda yaşayırlar. Albaniya, Azərbaycan deyəndə, bu, hamı üçün eyni, müştərək bir tarixdir”.