Azərbaycanın inkişafı İlham Əliyevin uzaqgörən siyasətinin nəticəsidir

Bu gün Azərbaycan regionun yeganə ölkəsidir ki, daxili və xarici siyasəti ilə həm inkişaf edir, həm iqtisadi sistemini təkmilləşdirir, həm də regional təhlükəsizliyin təmin olunması istiqamətində addımlar atır. Təbii ki, ölkəmizin əldə etdiyi bu uğurlar Prezident İlham Əliyevin düşünülmüş və uzaqgörən fəaliyyətinin nəticəsidir. Dünya miqyasında nüfuzu durmadan artan və regionun lider dövləti sayılan Azərbaycanın inkişaf yolu, uğurları və qələbələri bütün dünyanın da diqqət mərkəzindədir. İstər beynəlxalq təşkilatlar, istərsə də dünya dövlətləri ölkəmizin uğurlu inkişaf yolunu bəyənir və nümunə götürür.

Prezident İlham Əliyevin son 19 ildə həyata keçirdiyi güclü dövlət, güclü ordu strategiyası torpaqlarımızın işğaldan azad olunması ilə nəticələndi. Ölkə başçısı bütün təzyiqlərə baxmayaraq, qəti siyasi iradə nümayiş etdirməklə prinsipial mövqeyindən dönmədi. Bu qətiyyət və siyasi iradə Azərbaycanın inkişafı, daha güclü və sabit dövlət olması, həmçinin vətəndaşların rifahının daha da yaxşılaşdırılması üçün bu gün də göstərilir. Vətən müharibəsində qazanılan qələbə isə ölkəmizə dünyada olan ehtiramı gücləndirməklə dövlətimizin nüfuzunu daha da artırdı.