Azərbaycanın mədəni irsi və turizm potensialı nümayiş etdirilib

BMT-nin Dənizə çıxışı olmayan inkişaf etməkdə olan ölkələr üzrə Üçüncü Konfransı çərçivəsində Türkmənistanın YAŞLIK telekanalı Azərbaycanın mədəniyyətini və turizm potensialını özündə əks etdirən xüsusi sujet yayımlayıb.

Sujetdə ölkəmizin füsunkar təbiəti, zəngin tarixi və qədim memarlıq abidələri tamaşaçılara təqdim olunur.

Azərbaycanın turistik məkanları – İçərişəhərdən Qobustana, Şəkidən Xınalığa qədər müxtəlif bölgələrə dair görüntülər ekranlara gətirilib.

Sujetin diqqətçəkən məqamlarından biri də milli geyimlərimiz, rəqslərimiz və qədim adət-ənənələrimizin nümayiş etdirilməsidir. Fonda isə Azərbaycan xalq musiqisi səsləndirilib.

Telekanalın hazırladığı bu material Azərbaycanın mədəni irsinin və turizm imkanlarının təbliği baxımından xüsusi əhəmiyyət daşıyır.

Qardaş ölkənin televiziya ekranında Azərbaycanın təqdimatı həm də ölkələrimiz arasında mədəni əlaqələrin və dostluq münasibətlərinin bir nümunəsi kimi dəyərləndirilir.