Azərbaycanla İran arasında əlaqələr daha da genişləndirilir

Azərbaycan və İran arasında dostluq və tərəfdaşlıq münasibətləri yeni müstəviyə qədəm qoyur. İran İslam Respublikasının Prezidenti Məsud Pezeşkian İranda səfərdə olan Azərbaycan Baş nazirinin müavini Şahin Mustafayevin rəhbərlik etdiyi nümayəndə heyətini qəbul edib. Baku TV-nin süjetində qeyd olunur ki, görüşdə Prezident İlham Əliyevin salamları çatdırılıb və iki ölkə arasındakı əlaqələrin uğurla inkişaf etdiyi vurğulanıb. Tərəflər iqtisadi, nəqliyyat, energetika və təhlükəsizlik sahələrində əməkdaşlığın dərinləşdirilməsi, xüsusilə Şərqi Zəngəzur və Naxçıvan arasında yeni kommunikasiya xətlərinin çəkilməsi, "Araz-2025" birgə hərbi təlimləri və "3+3" platforması çərçivəsində regional dialoqun əhəmiyyətini müzakirə ediblər. Bu görüş rəsmi Tehranın və Bakının qonşuluq siyasətinə sadiqliyini və qarşılıqlı maraqlar əsasında münasibətləri daha da genişləndirmək iradəsini nümayiş etdirir.