İrəvan görüşü delimitasiya prosesini siyasi etimad mərhələsinə daşıyır - Baku TV

Azərbaycan–Ermənistan münasibətlərində növbəti diqqətçəkən diplomatik mərhələ yaşandı. Baş nazirin müavini, delimitasiya üzrə Dövlət Komissiyasının sədri Şahin Mustafayev rəhbərlik etdiyi nümayəndə heyəti ilə Ermənistana səfər etdi.

İrəvanda baş tutan bu səfər yalnız növbəti texniki görüş kimi deyil, həm də tərəflər arasında etimadın möhkəmləndirilməsi baxımından mühüm siyasi mesaj kimi qiymətləndirilir.

Ağverəndə keçirilən delimitasiya komissiyalarının 13-cü iclasında Azərbaycan və Ermənistan nümayəndələri dövlət sərhədinin müəyyənləşdirilməsi üzrə texniki sənədlərin hazırlanmasına dair mühüm razılaşmalar əldə etdilər. Tərəflər ekspert qruplarının iş qaydası, delimitasiya xəritələrinin hazırlanması və sənədlərin tərtibatı ilə bağlı təlimat layihələrini razılaşdıraraq hökumətlərə təqdim etmək qərarına gəliblər.

Ən diqqətçəkən məqamlardan biri isə növbəti iclasın Azərbaycanda keçirilməsi barədə razılığın əldə olunmasıdır. Bu qərar dialoqun fasiləsiz davam etdiyini və tərəflərin danışıqlar mexanizmini qorumaqda maraqlı olduğunu göstərir.

Şahin Mustafayevin bu səfəri ətrafında Ermənistan mediasında xüsusi diqqətçəkən digər detal isə onun bioqrafiyası oldu. Ermənistanda doğulub böyüməsi, orada təhsil alması və erməni dilini bildiyi barədə yayılan məlumatlar İrəvan mediasında geniş müzakirə edildi.

Rəsmi Bakı bu mövzuya münasibət bildirməsə də, müşahidəçilər hesab edirlər ki, belə humanitar və şəxsi bağlantılar danışıqlar prosesində psixoloji baryerlərin aşılmasına yardım edə bilər.

Ekspertlər hesab edirlər ki, İrəvandakı bu görüş bir daha göstərdi: Bakı və İrəvan arasında proses artıq bəyanatlar mərhələsindən çıxaraq konkret mexanizmlər müstəvisinə keçir. Əgər növbəti iclas Azərbaycanda da eyni konstruktiv atmosferdə baş tutarsa, bu, sülh sazişinə gedən yolda növbəti praktik addım kimi tarixə düşə bilər.