Azərbaycanlı namizəddən İrana sərt tənqid | Bütün dünyanın düşməniyik, amma...

Prezidentliyə namizəd, milliyətcə Azərbaycan türkü olan Məsud Pezeşkianın İranda qeyri-farslara qarşı münasibət, Tehran hökumətinin qonşu ölkələrlə, xüsusən Azərbaycan və Türkiyə ilə bağlı siyasətini tənqid edən çıxışının mətni yayılıb.

Prezidentliyə namizədə yaxın mənbələrin yaydığı mətn belədir:

“Niyə ölkədə müəyyən bir qrup hakimiyyət olmalıdır?! Bu cəmiyyətdə farslar, türklər, ərəblər yaşayırlar. Bəzilərini qəbul edir, bəzilərini isə özümüz üçün təhlükə hesab edirik. Bir çox etnik qrupların cəmiyyətimizdə yeri yoxdur. Niyə ölkədə xüsusi qrup güc sahibi olmalıdır?

Ümumiyyətlə, türklər bu məmləkətdə tayfa deyil, onlar bu ölkədə imperiya qurmuş millətdir. Biz “azəri” deyilik, türkdən doğulmuşuq, türkük. Bu ölkədə millətləri düşmən görmək siyasətinə son qoyulmalıdır. Bu insanlar İranın ən böyük sərvətidir.

Ölkəmiz bütün dünyanın düşmənidir. Qonşu dövlətlərlə problemimiz var. Hamının daxili işinə qarışırıq, hamını düşmən elan etmişik.

İran başqa ölkələrin daxili işlərinə qarışmamalı, mehriban qonşuluq siyasətini həyata keçirməlidir. Əgər bir qonşu dünyəvi ölkədirsə, biz onun hökumət strukturuna hörmət etməli, inqilab ixrac etməməliyik. Bir çox dövlətlər bizi təhlükə hesab edir. Onlar özləri seçim etməlidirlər. İran bu sərt və düşmənçilik siyasətindən əl çəkməlidir.

Azərbaycan Respublikası ilə əlaqələr bizim xüsusi diqqətimizdə olmalıdır. Bəlkə də, tarixdə İran və Azərbaycan qədər bir-birinə yaxın ikinci ölkə yoxdur. Bu mədəni-tarixi yaxınlığı aktiv bir yaxınlığa çevirsək, daha çox fayda görməyəcəyik? Azərbaycan bizim üçün üstünlükdür, bu ölkəni yanımızda saxlamalıyıq.

Bir anlıq düşünün, Azərbaycan Cənubi Qafqazda mühüm mövqeyə malikdir. Biz Azərbaycana qarşı sərt siyasəti davam etdirsək, Azərbaycan İrana düşmən olan daha çox dövləti regiona gətirmək iqtidarındadır.

Ən mühüm məqam odur ki, “Qəsr Şirin” sülh müqaviləsindən sonra Türkiyə ilə İran arasında heç bir müharibə olmayıb, ona görə də Türkiyə ilə normal münasibətlər mümkündür. Ermənistan da bizimlə qonşu ölkədir və biz Ermənistanla normal münasibətlərimizi davam etdirməli, ticarətimizi inkişaf etdirməliyik. Biz Azərbaycan və Ermənistanı səmimi şəkildə dəstəkləməli, yekun sülh üçün kömək etməliyik”.