Baia Mare və Xankəndi şəhərləri qardaşlaşma haqqında niyyət protokolu imzalayıb - Baku TV

Rumıniyanın Baia Mare və Xankəndi şəhərləri arasında qardaşlaşma sazişinin imzalanması haqqında niyyət protokolu imzalanıb.

Baia Mare şəhərinin meri Ioan Doru Denkuş çıxışında bildirib ki, bu hər iki şəhər arasında əməkdaşlığın yeni mərhələyə yüksəlməsinə imkan yaradacaq.

Onun sözlərinə görə, təşəbbüs çərçivəsində yeni iqtisadi və investisiya imkanlarının təşviqi, biznes dairələri arasında birbaşa əlaqələrin qurulması, yerli administrasiyalar arasında birgə layihələrin həyata keçirilməsi, eləcə də mədəniyyət, təhsil və turizm sahələrində əməkdaşlığın genişləndirilməsi nəzərdə tutulur.

Xankəndi şəhəri, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov Azərbaycan ilə Rumıniya arasında dərin köklərə söykənən dostluq, tərəfdaşlıq və strateji əməkdaşlıq münasibətlərinin olduğunu, Rumıniyanın Azərbaycanın müstəqilliyini Avropada tanıyan ilk ölkə olduğunu vurğulayıb.

O, Xankəndi şəhərinin 30 il sürən işğaldan sonra Prezident İlham Əliyevin rəhbərliyi ilə yeni mərhələyə – dirçəliş, quruculuq və beynəlxalq əməkdaşlıq mərhələsinə qədəm qoymasının böyük əhəmiyyətini qeyd edib.

Çıxış zamanı iki ölkə arasında mövcud olan münasibətlər, xüsusən regionlararası əlaqələrin inkişafına yönəldilməsini nəzərdə tutan birgə layihələr barədə məlumat verilib.