Bakıda Dördüncü İqlim Həftəsi öz işinə başladı - Baku TV

Xarici İşlər Nazirliyinin təşkilatçılığı ilə Birləşmiş Millətlər Təşkilatının İqlim Dəyişikliyi üzrə Çərçivə Konvensiyasının Dördüncü İqlim Həftəsi Bakıda öz işinə başlayıb.

Tədbir 7–11 sentyabr tarixlərində keçiriləcək.

İqlim Həftəsinin ilk günü enerji keçidi, iqlim maliyyələşməsi və sənayenin karbonsuzlaşdırılması mövzularına həsr olunub. Gün ərzində müxtəlif panel iclasları və dəyirmi masalar təşkil olunub, aktual məsələlər ətrafında müzakirələr aparılıb.

Tədbir çərçivəsində “Bakı İqlim Fəaliyyəti Həftəsi 2026” da keçiriləcək. Müzakirələrdə iqlim qərarlarının qəbul edilməsi, beynəlxalq əməkdaşlığın qurulması və gücləndirilməsi, həmçinin qarşıdan gələn COP31 ərəfəsində iqlim fəaliyyətinin sürətləndirilməsi məsələləri diqqət mərkəzində olacaq.

Hazırda keçirilən dəyirmi masa binaların enerji effektivliyi üzrə pasportlaşdırılması mövzusuna həsr olunub. Tədbirdə Azərbaycan Respublikasının Energetika Nazirliyinin şöbə rəhbərləri və mütəxəssisləri, eləcə də Türkiyədən olan ekspertlər və Türkiyənin Enerji və Təbii Sərvətlər Nazirliyi ilə Ətraf Mühit, Şəhərsalma və İqlim Dəyişikliyi Nazirliyinin nümayəndələri iştirak edirlər.

Dəyirmi masa çərçivəsində Türkiyədə binaların tikintisinin ilk mərhələsindən son mərhələsinədək enerji effektivliyi və enerji təchizatı ilə bağlı yanaşmalar haqqında təqdimat keçirilib. Təqdimatda gələcəkdə binaların iqlim məqsədlərinə töhfə verməsi üçün həyata keçirilməli tədbirlər və enerji təminatının necə qurulmalı olduğu barədə məlumat verilib.