Bakıda keçiriləcək WUF13-lə bağlı müraciətlərin qəbulu nə zaman başa çatır? - Baku TV

2026-cı il 17-22 may tarixlərində Bakıda keçiriləcək WUF13 – Ümumdünya Şəhərsalma Forumunun On Üçüncü sessiyası çərçivəsində təşkil olunacaq tərəfdaş tədbirləri üzrə qeydiyyat prosesi davam edir.

Müraciətlərin qəbulu üçün son tarix 2026-cı il yanvarın 29-u müəyyən edilib. Beləliklə, forum çərçivəsində keçiriləcək tədbirlər üzrə müraciətlərin qəbulunun başa çatmasına bir ay qalıb.

Şəhərsalma sahəsində beynəlxalq dialoq və əməkdaşlıq platforması olan WUF13 qurum və təşkilatlara Forumun “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna uyğun tədbirlər təşkil etmək imkanı yaradır.

Müraciətlər https://events.unhabitat.org/ vasitəsilə təqdim edilməlidir.

Tədbirlərin təşkili üçün müraciətlər yeddi kateqoriya üzrə qəbul olunur: Şəbəkələşmə, Vahid BMT, Dayanıqlı İnkişaf Məqsədlərinin tətbiqi, Şəhər kinoteatrı, Şəhər Kitabxanası, Şəhərlərin Səsi və WUF Akademiyası.

Müraciət edən qurum və təşkilatlar ilkin mərhələdə “UN-Habitat”ın Qlobal Tədbir İdarəetmə Sistemi platforması üzərindən onlayn qaydada qeydiyyatdan keçməlidirlər.

Qeydiyyat prosesi tamamlandıqdan sonra istifadəçilər şəxsi paneldə yerləşən “Applications/Müraciətlər” bölməsinə daxil olaraq müvafiq kateqoriyalar üzrə tələblərlə tanış ola və müraciətlərini yekunlaşdıra bilərlər.

Qeyd edək ki, hər bir kateqoriya üzrə yalnız bir müraciət təqdim edilə bilər. Qeydiyyat və tədbirlərin təşkili ilə bağlı əlavə məlumat almaq üçün unhabitat-events@un.org elektron poçt ünvanı ilə əlaqə saxlamaq mümkündür.