Bakıda Rusiya-Azərbaycan Ekspert Şurasının beşinci iclası

Birgə səylərin istiqamətləndirilməsi vektorlarından biri regional siyasi və iqtisadi əməkdaşlığın təmin edilməsinə və kənardan dağıdıcı müdaxilə cəhdlərinin məhdudlaşdırılmasına ümumi yanaşmalardır.

Bunu Azərbaycan Xarici İşlər Nazirliyinin xüsusi tapşırıqlar üzrə səfiri Elşad İsgəndərov Bakıda keçirilən Rusiya-Azərbaycan Ekspert Şurasının V iclasında deyib.

“Sevindirici haldır ki, qısa müddət ərzində ekspertlərimizin görüşdüyü platforma artıq beşinci iclasını keçirir”, – o vurğulayıb.

Onun sözlərinə görə, bu tədbirin keçirilməsi Rusiya-Azərbaycan münasibətlərini daha da yaxınlaşdırmaq iradəsinin necə reallaşdığına nümunədir:

“Üç il əvvəl bu fikir ilk dəfə səsləndiriləndə qeyd etmişdik ki, bu görüş sadəcə bir dəfə keçirilməməlidir və bu təşəbbüsün praktiki nəticəsi olmalıdır. Azərbaycan və Rusiya liderlərinin siyasi iradəsi onu göstərir ki, dünyada baş verən tektonik sürüşmələrə və Cənubi Qafqazda dəyişən vəziyyətə baxmayaraq, iki ölkə bir-birinə qarşı olan müsbət münasibətini qoruyub saxlaya bilib. Bütün sahələrdə müsbət inkişaf dinamikası nümayiş etdirilir”.