Bakının azad edilməsinin 108-ci ildönümü münasibətilə anım mərasimi keçirilib - Baku TV

Bakının erməni və bolşevik dəstələrindən Qafqaz İslam Ordusu tərəfindən azad edilməsinin 108-ci ildönümü ilə əlaqədar Bakı Türk Şəhidliyində anım mərasimi keçirilib.

Mərasimdə Türkiyənin Azərbaycandakı səfiri Birol Akgün, Şimali Kipr Türk Cümhuriyyətinin Bakıdakı nümayəndəsi, səfir Ufuk Turganer, Türkiyənin Azərbaycandakı diplomatik nümayəndəliyinin əməkdaşları, türk qurum və təşkilatlarının nümayəndələri, iş adamları və Azərbaycan vətəndaşları iştirak ediblər.

Tədbir şəhidlərin xatirəsinin 1 dəqiqəlik sükutla yad edilməsi ilə başlayıb. Daha sonra Türkiyənin Bakıdakı səfiri Birol Akgün Türk Şəhidliyinin önünə əklil qoyub. Azərbaycan Müdafiə Nazirliyinin Hərbi Orkestri tərəfindən Azərbaycan Respublikasının Dövlət Himni və Türkiyənin “İstiqlal marşı” səsləndirilib.

Daha sonra səfir Birol Akgün Şəhidlik xatirə kitabını imzalayıb, şəhid məzarlarına qərənfillər düzülüb. Mərasimdən sonra Birol Akgün və tədbir iştirakçıları 20 Yanvar şəhidlərinin dəfn olunduğu Şəhidlər xiyabanını ziyarət ediblər.