Baxmutda nə baş verir?

“Rusiya Ukraynanın Baxmut şəhərini tam nəzarətə götürüb”.

Bu barədə “Vaqner” Özəl Hərbi Şirkətinin rəhbəri Yevgeni Priqojin açıqlama verib. O bildirib ki, Baxmut indi tamamilə “Vaqner”in nəzarəti altındadır.

Rusiya Prezidenti Vladimir Putin “Vaqner” Özəl Hərbi Şirkətini və Rusiya Silahlı Qüvvələrinin mənsublarını Baxmutu ələ keçirmək münasibətilə təbrik edib. Bununla yanaşı, Baxmutun ələ keçirilməsində fərqlənənlərin təltif ediləcəyi bildirilir.

Mətbuatda yayılan məlumata görə, Ukrayna Prezidenti Volodimir Zelenski Baxmut şəhərinin ələ keçirildiyini etiraf etsə də, Ukrayna Prezident Ofisi ölkə başçısı adından yayılan məlumatı təkzib edib.

Prezident Ofisinin mətbuat katibi Sergiy Nikoforov “Facebook” səhifəsində V.Zelenskiyə ünvalanan sualın fərqli olduğuna işarə edib.

Qeyd edək ki, Rusiya Silahlı Qüvvələrinin mayın 21-də səhər saatlarından Kiyevi yenidən bombalaması ilə bağlı xəbərlər yayılıb. Partlayış nəticəsində binada yanğın baş verib. Hadisə nəticəsində həyatını itirən və yaralananlar olmayıb. Bunun bu ay Kiyevə edilən 11-ci hava hücumu olduğu da açıqlanıb.