Bayden, Putin, Zelenski və Makrondan Ərdoğana mesaj

Dünya liderləri Rəcəb Tayyib Ərdoğanı Prezident seçkilərində qazandığı qələbə münasibətilə təbrik ediblər.

ABŞ Prezidenti Co Bayden “Twitter”dəki təbrik paylaşımında Türkiyə ilə ikitərəfli məsələlər üzrə işləməyə davam etməyi səbirsizlikə gözlədiyini qeyd edib. Rusiya lideri Vladimir Putin isə təbrikində türkiyəli həmkarının Rusiya-Türkiyə münasibətlərinin möhkəmlənməsinə töhfəsini qeyd edərək, tərəflər arasında konstruktiv dialoqu davam etdirməyə hazır olduğunu bildirib.

Fransa Prezindenti Emmanuel Makron Ərdoğanı türk dilində təbrik edib. “Fransa və Türkiyənin birlikdə öhdəsindən gəlməli olduğu önəmli məsələlər var. Yenidən seçilməsi münasibətilə təbrik etdiyim Prezident Ərdoğanla birlikdə irəliyə getməyə davam edəcəyik”, – deyə E.Makron yazıb.

Ukrayna Prezidenti Volodimir Zelenski də Ərdoğanı türk dilində təbrik edib. “Ümidim torpaqlarımızın mənafeyi naminə, eləcə də Avropanın təhlükəsizliyi və sabitliyi naminə qarşılıqlı əməkdaşlığı gücləndirməkdir”, – deyə V.Zelenski vurğulayıb.

Böyük Britaniya Baş naziri Rişi Sunak isə “Twitter”dəki təbrik paylaşımında ölkəsi ilə Türkiyə arasında güclü əməkdaşlıq əlaqələrinin olduğunu vurğulayıb. Almaniya kansleri Olaf Şolts isə ölkəsi ilə Türkiyənin yaxın tərəfdaşlar və müttəfiqlər olduğunu qeyd edib.

Ərdoğanı təbrik edənlər arasında Avropa İttifaqı Şurasının Prezidenti Şarl Mişel də var. “Qarşıdakı illərdə Aİ-Türkiyə əlaqələrini dərinləşdirməklə bağlı sizinlə yenidən işləməyi səbirsizliklə gözləyirəm”, – deyə Ş.Mişelin təbrik paylaşımında qeyd olunub.

Avropa Komissiyasının Prezidenti Ursula fon der Lyayen təbrik mesajında qeyd edib ki, Aİ-Türkiyə əməkdaşlığı xalqların xeyrinədir.

Ermənistanın Baş naziri Nikol Paşinyan da Türkiyə liderini yenidən prezident seçilməsi münasibətilə təbrik edib. “Ölkələrimiz arasında münasibətlərin tam normallaşması istiqamətində gördüyümüz işlərin davamını səbirsizliklə gözləyirəm”, – deyə Baş nazir qeyd edib.