Beynəlxalq Astronavtika Konqresi Bakıda keçiriləcək

Bakıda 74-cü Beynəlxalq Astronavtika Konqresi keçirilir. Bununla bağlı Milli Məclisdə Beynəlxalq Astronavtika Konqresi (IAF) Nazirlər və parlament üzvləri üçün iclası baş tutub.

Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili iclasda çıxış edib.

O bildirib ki, 50 il bundan əvvəl - 1973-cü ildə Bakıda Azərbaycanın Ümummilli Lideri Heydər Əliyevin təşəbbüsü ilə 24-cü Konqres keçirilib:

"Bu il biz Ulu Öndərin 100 illik yubileyini qeyd edir və onun xatirəsini ehtiramla yad edirik. İndi ölkəmiz ən böyük kosmik hadisəyə - 74-cü Beynəlxalq Astronavtika Konqresinə 2023-cü ildə ev sahibliyi edir. Bu, o deməkdir ki, Beynəlxalq Astronavtika Konqresi yarım əsrdən sonra bölgəmizə qayıdır. Həm məzmununa, həm də iştirakçıların sayına görə bu konqresdə əvvəlkilərdən daha çox nümayəndə təmsil olunur".

Qeyd edək ki, oktyabrın 6-dək davam edəcək tədbirdə 30 müxtəlif ölkədən 1500-dən çox iştirakçı iştirak edir.