Beynəlxalq İqlim Sammitinin keçirilməsi ölkəmizə nə verəcək?

Azərbaycanın 2024-cü ildə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına ev sahibliyi edəcək olması tarixi bir hadisədir. Bu, ölkəmizin beynəlxalq arenada nail olduğu nüfuzun və dünya birliyinin ölkəmizə qarşı duymuş olduğu etimadın göstəricisidir.

Xüsusilə də Qarabağda lokal xarakterli antiterror tədbirlərindən sonra beynəlxalq iqlim sammitinin Azərbaycanda keçirilməsinə qərarın verilməsi böyük siyasi önəm daşıyır. Bu hadisə həm də Azərbaycanın beynəlxalq hüquqa əsaslanaraq öz konstitusyon quruluşunu bərpa etməsinin dünya birliyi tərəfindən qəbul olunması deməkdir.

Digər tərəfdən, Azərbaycanın iqlim sammitinə ev sahibliyi etməsi onun siyasi-iqtisadi sahədə qazandığı uğurların məntiqi davamı da adlana bilər. Baxmayaraq ki, Azərbaycan neft-qaz ölkəsidir, amma ölkəmiz alternativ enerji sahələrinin genişləndirilməsi ilə əlaqədar dünyanın aparıcı şirkətləri ilə sazişlər imzalayıb. 2030-cu ilə qədər istehsal edilən elektrik enerjisinin 30 faizinin yaşıl enerji üzərinə keçirilməsi ilə bağlı könüllü öhdəlik götürüb.

Millət vəkili Vüqar Bayramovun sözlərinə görə, beynəlxalq iqlim sammitinin ölkəmizdə keçirilməsi Azərbaycana daha çox sərmayənin cəlb edilməsinə imkan yaradacaq: “Tədbir müddətində ölkəmizə 50 min iştirakçının gələcəyi gözlənilir. Bu da turizm üçün gəlirdir. Digər tərəfdən, belə tədbirlər gəlmə turizm üçün yeni imkanlar yaradır və ölkəyə gələnlərin sayının artmasına səbəb olur”.