Bir qrup xarici QHT bəyanat yaydı

Bir qrup xarici QHT nümayəndəsi Azərbaycanın Qarabağ regionunun erməni sakinlərinin reinteqrasiyasını Ermənistanın əngəlləməsi haqqında bəyanat yayıb.

Bildirilir ki, çoxmillətli ölkə olan Azərbaycan ərazisində yaşayan ermənilərin və digər etnik azlıqların bərabər hüquqlar çərçivəsində, dinc şəkildə yaşaması üçün əlverişli mühit yaradır. Qanunvericiliyə uyğun olaraq, Qarabağda yaşayan erməni sakinlərinin hüquq və təhlükəsizliyi də təmin ediləcək.

Bəyanatda qeyd olunur ki, Ermənistanın bir sıra məmurları tibbi evakuasiya üçün funksional olan Laçın yolu haqqında siyasi manipulyasiya və spekulyasiya yaratmağa çalışsa da, bu iddialar tamamilə əsassızdır. Azərbaycan tərəfinin Qarabağın erməni sakinlərinin ehtiyaclarını ödəmək üçün Ağdam-Xankəndi yolundan istifadə etmək təklifini xatırladan bəyanatı imzalayanlar həmin yolun hər növ yüklərin daşınması üçün tam işlək vəziyyətdə olduğunu vurğulayıblar.

Bildirilib ki, buna rəğmən qanunsuz rejimin qalıqları Qarabağda sadə erməniləri girov götürür və həmin yoldan istifadə etməkdən imtina edirlər. Ermənistan Qarabağdakı ermənilərin gündəlik ehtiyaclarının Azərbaycan hökuməti vasitəsilə asanlıqla həllinə mane olmaqla reinteqrasiya prosesini əngəlləyir. Beynəlxalq ictimaiyyət bilməlidir ki, Azərbaycan blokada yaratmır. Əksinə, yardım təklif edir.

Qeyd olunub ki, Ermənistanın 30 ildən artıqdır Naxçıvanı blokadada saxlaması Muxtar Respublikanın əhalisinə, onların iqtisadi fəaliyyətlərinə, zəruri xidmətlərə çıxışına və hərəkət azadlığına ciddi təsir göstərir.

Bəyanatda bildirilib ki, reinteqrasiya məqsədilə Azərbaycan yerli ermənilərlə fəal şəkildə əlaqə yaradır. Bu məqsədlə Azərbaycandan təmsilçi qismində məsul şəxs təyin edilib. Lakin Ermənistan tərəfi danışıqlarda irəliləyişə mane olub və ilk görüşdən sonra aidiyyəti olmayan ilkin şərtlər irəli sürərək təmasları davam etdirmək üçün Bakıya gəlməkdən imtina edib. Bəyanatı imzalayanlar Ermənistan hökumətini təxribatları dayandırmağa çağırır. Beynəlxalq təşkilatlardan məsələyə adekvat reaksiya verməkləri və Qarabağ ermənilərinin Azərbaycana reinteqrasiyası prosesini dəstəkləmələri xahiş olunur.