Biz beynəlxalq mövqelərimizi böyük dərəcədə möhkəmləndirə bildik | Prezident - Baku TV

“Biz beynəlxalq mövqelərimizi böyük dərəcədə möhkəmləndirə bilmişik və bu gün Azərbaycana dünyada böyük hörmətlə yanaşılır”.

Bu fikirləri Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində səsləndirib.

Dövlət başçısı bildirib ki, Azərbaycanın artan nüfuzu ölkəyə beynəlxalq aktorlar tərəfindən göstərilən maraqda da aydın şəkildə özünü göstərir:

“Dünyanın aparıcı beynəlxalq aktorları Azərbaycanla əməkdaşlıq etmək üçün müxtəlif təkliflər irəli sürürlər. Xarici siyasətimiz çoxşaxəlidir və bu siyasət bir çox istiqamətlər üzrə uğurla həyata keçirilir”.

Prezident vurğulayıb ki, Azərbaycanın beynəlxalq təşkilatlarda fəallığı və nüfuzu yeni üzvlüklərlə də təsdiqlənir. O qeyd edib ki, bu il Azərbaycan D-8 beynəlxalq təşkilatına üzv olub və bu, xüsusi əhəmiyyət daşıyır:

“Səkkiz böyük müsəlman ölkəsini birləşdirən və təxminən 30 ilə yaxın fəaliyyət göstərən bu təşkilatın ilk yeni üzvü məhz Azərbaycan olub. Bu fakt ölkəmizə göstərilən hörmət və etimadın açıq ifadəsidir”.

Dövlət başçısı, eyni zamanda, Azərbaycanın Orta Asiya ölkələri ilə münasibətlərinin yeni mərhələyə qədəm qoyduğunu bildirib:

“Bu il Orta Asiya ölkələrinin Məşvərət Şurasına yekdilliklə tamhüquqlu üzv seçilməyimiz tarixi nailiyyətdir. Bu, həm həmin ölkələrlə səmimi münasibətlərimizin göstəricisidir, həm də Azərbaycanın bu gün nə qədər önəmli ölkə olduğunu aydın şəkildə ortaya qoyur”.