BMT baş katibindən Sudanla bağlı xəbərdarlıq

“Sudanda istənilən eskalasiya ölkə və region üçün dağıdıcı ola bilər”.

Bunu BMT Baş katibi Antonio Quttereş “Twitter”dəki hesabında yazıb. “Sudanda döyüşlər artıq dəhşətli insan itkilərinə səbəb olub. Gələcəkdə istənilən eskalasiya ölkə və region üçün dağıdıcı ola bilər. Vəziyyətə təsiri olanlar bundan zorakılığa son qoymaq, asayişi bərpa etmək və keçid yoluna qayıtmaqdan ötəri səyləri dəstəkləmək üçün istifadə etməlidirlər”, – deyə BMT Baş katibi bildirib.

Qeyd edək ki, Sudanda toqquşmalar başlayandan indiyə qədər 180-dən çox insan həlak olub, 1 800-dən çox insan yaralanıb. Aprelin 15-də ordu bölmələri ilə xüsusi təyinatlıların bölmələri arasında başlayan silahlı toqquşmalar davam edir. BMT-nin Ümumdünya Ərzaq Proqramının üç əməkdaşı toqquşmalar zamanı həlak olub. Bunun ardınca Ümumdünya Ərzaq Proqramı Sudanda fəaliyyətini dayandırıb.