Bu, Azərbaycanla imzaladığımız elə sənəddir ki… | Simonyandan delimitasiya açıqlaması

“Azərbaycan və Ermənistan Tavuş istiqamətində delimitasiya prosesinin başa çatmasından sonra bu prosesin hansı ərazidə davam etdiriləcəyini müzakirə edirlər. Hələlik qəti qərar verilməyib”.

Bu barədə Ermənistan parlamentinin sədri Alen Simonyan jurnalistlərlə söhbətində deyib.

Ermənistan və Azərbaycan arasında sərhədin delimitasiyası üzrə komissiyaların nizamnaməsinə toxunan A.Simonyan deyib ki, bu sənədin mövcudluğu çox əhəmiyyətlidir:

“Düşünürəm ki, bu sənədin mövcudluğu həm Ermənistan, həm də Azərbaycan üçün böyük qələbədir. Bu, ikitərəfli qələbədir və Ermənistanla Azərbaycan arasında ilk dövlətlərarası sənəddir. Onun həyata keçirilməsi həm Ermənistanın, həm də Azərbaycanın müstəqilliyi və ərazi bütövlüyü üçün ən mühüm təməl daşıdır. Biz irəliləməyə davam edəcəyik”.

A.Simonyan prosesin müsbət axarda olacağına ümid etdiyini vurğulayıb. Onun sözlərinə görə, delimitasiyanın harada davam etdiriləcəyi ilə bağlı hələ qərar yoxdur: “Hazırda prosesin harada davam etdirilməsi ilə bağlı müzakirələr gedir”.

A.Simonyan sərhədlərin bərpasının vacib məsələ olduğunu qeyd edib.